Текстот е објавен на 10 јули 2014 година
Златко Калински легендата на македонското спортско новинарство замина во пензија, синоќа со многу емоции тој се збогуваше од гледачите. Потсетуваме на интервју што „Фокус“ го направи со Калински пред три години.
Ова лето е интересно за сите. Дамите можат да уживаат во попустите на брендовите кои ја доставуваат својата понуда на увид во Скопје Сити Мол, а посилниот пол може да ужива во најважната споредна работа – следење на Мундијалот во Бразил.
Пред најжешкиот момент на Светско првенство во Бразил, ние во Скопје Сити Мол на фудбалско дегустирање ги поканивме македонските легенди Дарко Панчев и Златко Калински, кои минативе денови ја брануваа јавноста во земјава.
Под импресии на сега веќе легендарниот полуфинален меч помеѓу домаќините на Мундијалот и прецизните Германци, кафето го испивме во Скопје Сити Мол, споделувајќи ги најзначајните мигови од мечот кој собори низа рекорди и поттикна многу анализи.
Калински ни откри дека времето овие денови му лета, посебно заради убавиот предизвик, летот за Бразил, додека легендарниот Панчев посакуваше и таму да биде друштво на Златко.
Мечот Панчев против Калински го одигравме на сигурен теренот, во амбиентот на Спорт Вижн во Скопје Сити Мол. Резултатот ви го доставуваме на увид.
Скоро 4 децении верен на МТВ и спортските настани. Преносите со неговата специфична поетичност, сите го препознаваат неговиот уникатен стил на преставување на спортските случувања. Фудбалот и атлетиката се подрачја чиј терен најсигурно го владее.
ФОКУС: Калински, Бразил се смета за земја на фудбалот, затоа што оваа нација негува култ токму кон оваа спортска дисциплина. Немавте ли предизвик да одите таму, да коментирате од лице место?
КАЛИНСКИ: На ова прашањето веројатно ќе можев подобро да ви одговорам по завршувањето на светското првенство! Бидејќи, на 10 јули ќе патувам за Рио! Последниот мој коментар од едно светско првенство ќе е финалето од славната Маракана! Со колегата Горан Стерјов ќе бидеме првите македонски коментатори чиј глас ќе допре од Маракана! Таа е еден од најголемите спортски светски храмови, пандан на Вембли, Медисон Сквер Гарден, Монца, Циришки атлетски митинг…многу возбудливо…
ФОКУС: Калински, повеќе од 20 години во улога на спортски коментатор. Претпоставуваме посебно е возбудливо кога треба да се коментира Мундијалот, настан кој се смета за вистински празник на фудбалот.
КАЛИНСКИ: Ја одработувам 39-та година во спортското новинарство. Од 1975-та! Од својата 22-ра година кога почнав, кога улогата на спортист,вљубеник во спортот, на гледач кој местото на трибината го менува со многу поразличниот простор, во кој се професионалните новинари, светското фудбалско првенство стана неодминлив и најголем предизвик за мене. Нешто за што вредеше да се работи на личната изградба како новинар, како репортер и коментатор. Да се постигне чувството на достојност да се биде непосреден известувач од како што велите најголемиот спортски празник, кој го празнува целиот свет. Така Мундијалот го доживував како новинар – приправник, така го доживувам и сега при крајот на работниот век.
Со импресии раскажува за своите почетоци. За убавите мигови во МТВ, некои потешки, некои полесни, но сепак сите впечатливи. Со задоволство се потсети на Солдатов, човекот од кој како и голем дел од кадарот на МТВ научи многу за медиумскиот занает.
ФОКУС: Златко, коментирањето на спортски настани бара посебни подготовки. Не треба да се знаат само имињата на играчите. Тоа во оваа ера на технологија е лесно достапно за секој од публиката, се подготвувате ли за секој натпревар посебно?
КАЛИНСКИ: Ова е време кога Интернетот нуди море од податоци. Време, кое ја олеснува работата на коментаторот, особено ако е десет илјади километри далеку од местото на случувањето. Истовремено, бара континуитет и најмалку десетина часови подготовка пред секој пренос. Бидејќи, ќе се сложите, би било несериозно да се седне пред микрофон, а да се биде полошо информиран од телевизиски гледач со просечно следење на спортските настани. Треба да се биде подготвен за секоја ситуација, пласираниот податок да биде во функција на преносот… Не сум приврзаник на пласирање на многу бројки во преносите, мислам дека тоа го оптоварува гледачот, па така многу прибрани податоци, остануваат неискористени!
ФОКУС: После подолго време, заедно со Панчев, како да го вративте духот на телевизијата, на таа магична кутија што знае да биде извор на многу радости, но и тага. Како дојде до соработката со Панчев?
КАЛИНСКИ: Уживам во работата со Дарко. Вистинско задоволство е да се има таква фудбалска величина крај себе. Сѐ уште не ми е јасно, зошто толку време не сакаше да се искаже и како телевизиски коментатор! Пред ЕУРО 2012 конечно ја прифати поканата да стане дел од коментаторскиот тим на МРТ. Имаше одличен одзив во јавноста, па не беше тешко соработката да продолжи и на проектот Бразил 2014. 
Поранешниот македонски и југословенски фудбалски ас, легендарниот Панчев, кого поради брзината го викаа Кобра, кариерата ја започна во Вардар, а своите извонредни квалитети како стрелец најдобро ги прикажа во Црвена Ѕвезда, екипа во која сѐ уште многумина го паметат како најдобриот стрелец. Ја доби наградата Златна копачка на Европа како најдобар стрелец на европските национални првенства во сезоната 90/91.
ФОКУС: Панчев, за кого навивате на ова Светско првенство, сега откако испаднаа Хрватска и Босна и Херцеговина?
ПАНЧЕВ: Панчев Ќе продолжам да навивам за Хрватска и Босна и понатаму, се разбира, доколку не бидат со нас во група во следните квалификации за ЕП или СП. Овие денови мој фаворит ќе биде репрезентацијата на Германија.
ФОКУС: Калински, Англија го измисли фудбалот, а Бразил го прослави! Зошто оваа земја е најуспешната низ историјата? Зошто ги дала најголемите фудбалски имиња, зошто „кариоките“ го играат највозбудливиот фудбал, зошто Бразил ја има најколоритната и најемотивната навивачка армија на светот?
КАЛИНСКИ: Тешко може да се објасни бразилскиот фудбалски феномен. Тоа е забава со која се задоени младите во оваа земја. Талентираноста, темпераментот, исклучителната посветеност ја исковаа легендата! Социјалниот момент низ децении наназад, е само уште една компонента на фудбалот да се гледа како на како зрак на надеж за излез од бедата!
ФОКУС: Се чини уште еден печат на оваа мундофорија, во македонски рамки е коментаторскиот тандем Панчев – Калински. Ние во Фокус Ве пофаливме како нешто најдобро што и се случило на МТВ во поново време, но секако имаше и различни мислења. Како Вие двајца гледате на овој феномен?
ПАНЧЕВ: Јас ви благодарам на комплиментот. Деновиве, повеќемина на разни начини и лично ми го изразуваа своето задоволство и поддршка. Нормално, како секогаш и секаде, има и ќе има и поинакви мислења. Деновиве имав можност да прочитам еден многу интересен и воедно и интелигентен коментар од еден респектабилен Македонец. На неговиот профил на социјалните мрежи, професорот од Универзитетот Колумбија, Њујорк, г-динот Горазд Росоклија го објави својот став токму по ова прашање и јас ве молам во интерес на Вашите читатели да го цитирате во целост:
Горазд Росоклија: „ Сите знаеме кој е Дарко Панчев. Никој не знае кои се плукачиве „аналитичари“ на спортот, спортската мисла и говор. Некој да им каже дека легенда како Панчев се станува со создавање вредност, не со плукање по оној кој ја создал. И кога зборува Панчев кој го достигнал врвот на светот во спортот, мудро е ние другите да слушаме и да молчиме. А од кажаното од него, секој од нас ќе понесе онолку колку што сопствената памет му дозволува.“
ФОКУС: Калински, сепак, има и контроверзни реакции, што вие мислите за вашиот коментаторски тандем?
КАЛИНСКИ: Откако знам, за време на големите фудбалски настани, коментаторите се цел на јавното мислење. Сега во ерата на мноштво од социјални мрежи тоа е уште поизразено! Денеска „во игра“ се и обложувалниците, па на многумина ако резултатот не им се вклопува, виновни се коментаторите. Во моментов го коментирам последното светско фудбалско првенство во мојот работен век на МРТ. Јас сум тој, Златко Калински со свој начин на работа, кој сега и да сакам не би можел да го сменам. Што се однесува до Дарко Панчев го има фудбалот во малиот прст, а згора на тоа е со брза и јасна мисла. Не слушнав друг стручен коментатор да се осмели, ама на Дарко уште во прва минута не можеше да му се провлече неподготвеноста на Шпанија. Потоа прогнозата за кус мундијалски лет на Англија и Италија, веднаш го воочи и „бледилото“ на Бразил. Тој како да е во „дослух“ и со тренерите, па најчесто ги предвидува нивните измени на играчите. Забавен е, внесува лежерност и дух во преносите. Дарко е полн програмски погодок на МРТ.
ФОКУС: Златко, многу млади лица на екранот на МТВ, но се чини, барем ова лето Вие дадовте малку свежина на екранот, Ве поддржаа ли колегите во идејата, во овој нов коментаторски пристап?
КАЛИНСКИ: Работиме тимски во спортската редакција, па и интенцијата да го наговориме Дарко да стане наш „колега“ беше заедничка. „Генерациската поврзаност“ од 80-тите и 90-тите меѓу Дарко и мене, кога тој растеше како фудбалер а јас го следев како новинар, е причината што станавме тандем. 
Калински е скоро пред пензија, ова најверојатно ќе биде последно Светско првенство во фудбал кое го коментира.
ФОКУС: Многумина предложија, малку на шега, малку на вистина, дека Панчев треба да добие вработување во МТВ, што Калински мисли за една ваква идеја?
КАЛИНСКИ: Може! Уште сега би го вклучил во тимот за подготовка на проектите ЕУРО 2016 во Франција и Светско првенство 2018 во Русија. Сигурен сум дека со своето знаење и авторитет би придонел за повисоки стандарди во реализацијата на овие големи настани на програмата на МРТ.
Златната копачка ја освои во 1991. Ова беше неправда која беше исправена во 2006. Златната копачка за 34 гола кои ги постигна за Ѕвезда, Дарко Панчев требаше да ја прими во 91. Меѓутоа, наградата му беше скратена. Неправдата беше исправена 15 годни подоцна, на 4 август 2006, кога делегацијата предводена од тогашниот претседател на УЕФА, Мишел Платини и претседателот на Црвена Ѕвезда, Драган Стојковиќ Пикси, во Скопје конечно му го врачија признанието.
ФОКУС: Да направиме една паралела на времето кога вие игравте и ова сега. Постојат разлики? Господине Панчев, полесно ли им е на сегашните фудбалери?
ПАНЧЕВ: Големи разлики не може да има. И денес и некогаш, фудбалот се игра на истиот терен, играат 22 играчи, се игра со топка и со нога и најважно во играта е да се постигне гол. Фудбалот и натаму останува тешка физичка и психичка активност. Би се зачудиле кога би ги споредиле „километрите“ на фудбалерите од тоа време и денес. Секако, денес фудбалерите во своите подготовки ја користат науката повеќе и можеби, објективно се под поголем притисок, пред се поради развитокот на електронските медиуми со што нивната популарност добива и планетарни размери.
ФОКУС: Калински, која репрезентација и кој играч најмногу го привлече вашето внимание на ова Светско првенство во Бразил?
КАЛИНСКИ: Бразил, Германија, Аргентина, Холандија… Секако и Шпанија, Англија и Италија пред да бидат елиминирани. Ме одушевуваат и „малите“ Колумбија, Костарика, несреќниот Мексико… тие се неопходната свежина, надеж и поттик во светот на „големите и моќните“.
ФОКУС: Дарко, големите репрезентации на ова првенство се покажаа во лошо светло. Дали парите и третманот на играчите како ѕвезди во нивните репрезентации се можеби виновни за ова?
ПАНЧЕВ: Со Калински за време на преносите се согласивме дека и покрај тоа што на ова првенство се игра квалитетно и она што мене најмногу ме радува – напаѓачки, очигледен е малиот број на екстра играчи на шампионатот. За жал. За разлика од минатото, тој број е сведен на неколкумина. Лично не мислам дека проблемот е во скапите трансфери и третманот кој го добиваат најзвучните имиња на денешницата.
ФОКУС: Калински, каков е вашиот став по ова прашање. Големите репрезентации на ова првенство се покажаа во лошо светло. Дали парите и третманот на играчите како ѕвезди во нивните репрезентации се можеби виновни за ова?
КАЛИНСКИ: Речиси и да не се памети вакво урнисување на фаворитите уште во групната фаза од светското првенство! Шпанија беше фрлена на колена, Италија, Англија, Португалија, Русија си заминаа дома. Само една минута од елиминација ја делеше и Холандија. Тоа се земји фудбалски велесили со финансиски моќни клубови, со мнозинството од најплатените светски ѕвезди. Не би рекол дека причините за резултатскиот крах се од финансиска природа или од некаква демотивираност.
Според мене, многу фреквентната сезона на клупски план го зема данокот. Најдобрите фудбалери беа и најоптоварени во домашните првенства и купови, во европските лиги, во мечевите за своите национални селекции… Имаше малку време за нивна ревитализација и подготовка за Мундијалот. Вториот проблем особено присутен во Англија е што во Премиер лигата играат голем број на странски играчи, кои ги оневозможуваат талентираните домашни фудбалери да се изборат за поголема минутажа.
Главните финансиери на клубовите се странци, кои ги интересира само резултатот и финансискиот профит, а не иднината на домашната репрезентација. Ова се теми, за кои неминовно многу сериозно ќе се разговара.
ФОКУС: Панчев, кој играч за вас е најдобар на ова Светско првенство?
ПАНЧЕВ: Според мене, две имиња на крајот ќе имаат можност да бидат прогласени за најдобри. Едниот е Меси, за него не гледам никаква потреба за коментар, а вториот е напаѓачот на германската репрезентација Милер, кој овој турнир го игра на извонредно високо ниво, тој е созреан, на теренот делува моќно и се промовира во лидер на репрезентацијата.
Интересно е што и двајцата имаат слични ставови. Ова често го забележувавме во текот на нашата прошетка во Скопје Сити Мол.
ФОКУС: Панчев, Босна и Херцеговина успеа да стасаа до ова Светско Првенство. Што му недостасува на македонскиот фудбал? Ние имаме одлични фудбалери, но сѐ уште како репрезентација не се докажавме? Каде е проблемот во македонскиот фудбал?
ПАНЧЕВ: Како што го поставивте прашањето, логичен одговор би бил дека на нашиот фудбал му недостасуваат Осим и Сушиќ или Шукер бидејќи и Хрватска се квалификуваше на ова СП, па дури можеби и Савичевиќ, бидејќи Црна Гора стигна до бараж. Таму каде беа изоставени големите фудбалски имиња се разбира немаше успех. Малку ме зачудува оценката за големата множина на одлични фудбалери која што Вие ја споменувате, што е контрадикторно со тоа дека Репрезентацијата на Македонија не успеала да се докаже. Тоа е сериозна тема и заслужува сериозна и сеопфатна анализа и поради моментот, а и поради просторот ќе Ви се ставам на располагање во некоја друга пригода да разговараме по тие прашања.
ФОКУС: Калински, на неколку дена до финалето, се загрева фудбалската еуфорија, но останува постојано да виси во воздухот, една мала тага, Македонија, фудбалски никаде ја нема, од година в година е подолу, додека нашите соседи, земјите од екс СФРЈ грабаат напред, зошто?
КАЛИНСКИ: Прашање кое е во расчекор, кое не е во сообразност со величественоста во моментов! Во секој случај, горлива тема, болна. Го делам мислењето со оние кои сметаат дека во догледно време нема надеж да се завиори македонското знаме на еден голем фудбалски настан. Резултатите на репрезентацијата се само одраз на состојбите. Слабо, „исплакнато“ домашно првенство, недоволно инвестирање во стручните кадри и грижа за младите категории е дел од нашето фудбалско сивило. Во изминатите две сезони МРТ низ преноси програмски го покриваше македонското првенство, па можев поодблиску да навлезам во проблемите со кои се соочуваат клубовите. Беспарица, лоша инфраструктура, мал интерес за посериозно спонзорско покривање… состојба на „лет во место“, која се провлекува веќе две децении.
ФОКУС: Проблемот е во државата, во клубовите, во луѓето што го водат фудбалот или од сѐ по малку? Калински, дали ако сите во фудбалот го правеа најдобро тоа што го знаат, без да се мешаат во работата на другите, сега ќе беше поинаку?
КАЛИНСКИ: Сите имаат свој удел во ваквата состојба. Многу прашања се наметнуваат! Зошто истакнатите фудбалски имиња ги нема во македонскиот фудбал или ги има сосема малку, без влијание врз нештата? Зошто од македонската фудбалска карта полека исчезнуваат фудбалски центри,кои во минатото биле неисцрпен извор на таленти? Каде се Струмица, Прилеп, Охрид, Велес, Кавадарци? Зошто трибините се празни?
ФОКУС: Панчев, зошто и одличните македонски играчи во своите клубови играат фантастично, а во македонското опкружување не можат да се искажат?
ПАНЧЕВ: Слично е моето мислење и по ова прашање и затоа како што и претходно споменав, подобро е сега и во овој момент да уживаме во најдобрата работа на светот, фудбалот, тие анализи и оценки кои бараат сериозен и објективен пристап да ги оставиме за некое друго време.
ФОКУС: Зошто и после толку годишно откако сте во Македонија, не се одлучивте да создадете некакво училиште за фудбалери? Или можеби чекате подобри времиња, а тие не доаѓаат?
ПАНЧЕВ: Јас пред повеќе од 10 години и предложив проект за школо за фудбал на тогашната влада, па дури успеав да добијам и концесија. Добив писмена согласност и од ФК Милан заедно да пристапиме во реализација на идејата. Оттогаш, па се до денес, од за мене неразбирливи причини, случајот стои во Општината Карпош. Инаку, да се разбереме, приватните фудбалски школи во ниту еден случај не можат да бидат решение за проблемите во фудбалот во Македонија. Бројните примери и во најразвиените фудбалски земји укажуваат дека треба да се оди во друга насока.
Тоа го имаше и кај нас. Ако се вратиме во минатото, фудбалските школи на Вардар, Победа, Пелистер Беласица, Брегалница и другите, ги изнедрија нашите најдобри и најголеми фудбалски имиња. Би требало да се направи едно согледување, колку фудбалери од приватните школи кои постојат кај нас веќе 10тина години, играат во клубовите и колку од нив настапиле за македонската репрезентација. Во најголем дел тие школи вршат општествено корисна функција, децата спортуваат и се социјализираат. И оваа тема заслужува посебно внимание.
ФОКУС: Зошто сте малку пасивен во македонскиот фудбал? Се очекуваше дека еден човек, фудбалска легенда, со таков потенцијал, треба да биде поприсутен, да се даде себеси, или сметате дека има премногу ајкули во македонското фудбалско море?
ПАНЧЕВ: Јас лично мислам дека не сум сосема пасивен во фудбалот. Ако тоа така го разбирате, тоа и не е толку лошо. Тогаш барем од мене нема да се бара одговорност за состојбите во фудбалот кај нас, за неуспешните квалификации… Сега прашање е зошто ова не им се постави на оние кои се активни и кои се на функции во овие 20-ина години и која е нивната одговорност за катастрофалната состојба во која се наоѓа македонскиот клупски и репрезентативен фудбал.
Незаборавно беше шоуто на Панчев во Атина. На аеродромот во Атина ја испровоцира грчката јавност пишувајќи Македонец на формуларот за влез во земјата. Секој момент кога тој ќе ја допреше топката, следеа свирежи од навивачите на Панатинаикос, главно од припадниците на лево ориентираниот Пасок. Дарко им се оддолжи со два прекрасни погодоци со што зелените беа елиминирани. По вториот гол, заигра македонско оро и ја замолкна атинската публика. Ова како казна го почувствувала и неговата сопруга Маја, која поради овој момент била одбиена за грчка виза.
ФОКУС: Дарко, има ли меѓу поновата генерација после Пандев, играч што може да биде лидер на репрезентацијата?
ПАНЧЕВ: Во овој момент можеби не, но сигурен сум дека наскоро ќе се појави новиот Лидер на репрезентацијата Тоа секогаш било така.
ФОКУС: Порано, вообичаено фудбал гледаа мажите. Сега често и понежниот пол внимателно го следи сето она што се случува на теренот. Колку вашата сопруга Маја ги прати фудбалските мечеви на Мундијалот или можеби е критичар на Вашите коментари?
ПАНЧЕВ: Фудбалот не е само спорт, тоа е еден голем и атрактивен шоу бизнис. Нормално и нашите поубави половини се повеќе со интерес следат. Мојата сопруга Маја го следи фудбалот од поодамна, знае страствено да навива, ама не смее ни да помисли да ги критикува моите коментари. Затоа што нема причина.
ФОКУС: Играте ли сѐ уште фудбал понекогаш, онака за своја душа?
ПАНЧЕВ: Двапати неделно со моите поранешни фудбалски колеги уживаме во меѓусебното натпреварување на теренот на Алумина. Ривалството меѓу нас е сѐ уште големо и головите, па се разбира, резултатите на крајот сепак ни се најважни.
ФОКУС: Панчев, што покрај фудбалот и семејството знае да ви го преокупира вниманието?
ПАНЧЕВ: Секојдневното дружење со моите пријатели. 
ФОКУС: Кој е и што прави Златко Калински надвор од работното време, дали одвојува време за спорт?
КАЛИНСКИ: Од време на време ќе отпешачам некој километар или ќе одгледам „едно полувреме“ вртејќи ги педалите на велосипед-ергометар! Главно тоа е физичката активност, бидејќи колената ми се слаба точка. Малку пишувам. Историјата на светските првенства во атлетика ги заокружи првите 30 години од одржувањето, па како известувач од сите досега се обидувам моите видувања да ги ставам на хартија. Македонската телевизија оваа година ја одбележува 50-годишнината од постоењето, па добив многу пријатна обврска за подготовка на документарец за развојот на спортската програма. Има време и за по некоја партија „Црна маца“ со другарите кај Ѓутла!
ФОКУС: Дарко, англискиот спортски магазин Four Four Two ве прогласи за најдобар фудбалер од Црвена Ѕвезда на сите времиња. Колку тоа време буди убави сеќавања кај вас? Ви недостасуваат ли тие времиња понекогаш?
ПАНЧЕВ: Да, еден мој пријател ми го пренесе изборот на најтиражниот англиски спортски магазин. Тоа е голема чест, иако според мене таа титула сосема заслужено е резервирана за Драган Џаиќ. Убаво е човек да се навраќа во минатото, па оттука е и разбирливо дека понекогаш ми недостасуваат тие чувства, силни емоции, голови и успеси. Таков е животот!
Блиц прашања
КАЛИНСКИ
Фудбал или ракомет? Фудбалот со ништо не може да се спореди! Не ме прашувате за атлетиката! Таа е меѓу неприкосновениот фудбал и ракометот! Ракометот има посебно,незаборавно и емотивно место како спорт за прва моја афирмација како ТВ коментатор.
Светско првенство или Олимпијада? Светското првенство во фудбал го предизвикува најсилното спортско лудило. Собрани се десетици навивачки армии од целиот свет, полни со набој позитивен и негативен. Патуваат од град во град, силен е интензитетот со кој ја манифестираат својата радост или тага во зависност од успехот. Не им се страни и инцидентни ситуации. Олимпијадата е нешто друго. Се одржува во еден град, на мал простор се концентрирани нештата. Има сосема поинаков дух и привлечност. Атлетиката е олимписката кралица, има уште дваесетина спортови со своите „принцови и принцези“. Таа е најдоброто што може да го понуди целокупниот спортски свет. ја нуди и грандиозноста со учество на спортисти од над 200 земји. Заедничко за Мундијалот и Олимпијадата е големата привлечност за политиката да ги употреби во свои цели!
Дарко Панчев или Лионел Меси? Најубавото прашање го оставивте за крај! Секоја чест за Меси, ама Дарко е во сите наши срца. Пред три децении тој беше пандан на ова што е Меси денеска. Заслепувачки беше блесокот со кој се појави во нашето соседство. Херојот од Градски израсна во неприкосновениот крал на европските стрелци. Сјајот на неговата „златна копачка“ сите не милува. Дарко е најубавата, највозбудливата наша фудбалска приказна. Тој е македонскиот спортист за сите времиња.
ПАНЧЕВ
Вардар или Црвена Звезда? Вардар
Меси или Неимар? Меси
Златко Калински или Младен Делиќ? Златко Калински
Во очекување на финалето на овој Мундијал кој донесе многу интересни мигови, ги користиме предизвиците за шопинг во времето на попусти во Скопје Сити Мол.